Policia e Shtetit ka njoftuar sot përmbylljen e një operacioni policor në Tiranë për goditjen e veprimtarisë kriminale në fushën e armëmbajtjes pa leje.

Si rezultat i operacionit të zhvilluar nga Forca e Posaçme “Shqiponja”, u bë kapja dhe arrestimi në flagrancë i shtetasit R. Xh., 40 vjeç, banues në Tiranë, për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Forcat “Shqiponja” bazuar dhe në informacionet e marra në rrugë operative se në bulevardin “Bajram Curri”, një shtetas i armatosur po lëvizte me një motomjet, kanë organizuar punën dhe kanë finalizuar me sukses operacionin policor të koduar “Black bag”.

Gjatë kontrollit të çantës së këtij shtetasi, u gjetën dhe sekuestruan, në cilësinë e provës materiale, një armë zjarri pistoletë, një krehër dhe municion luftarak.

Materialet i kaluan Prokurorisë, për veprime të mëtejshme procedurale.